|
ՀԱՆԴԻՊՈՒՄ
ՀԱՅՐԵՆԱԿՑԱԿԱՆ, ՀԱՍԱՐԱԿԱԿԱՆ, ԿՐԹԱԿԱՆ ԿԱԶՄԱԿԵՐՊՈՒԹԻՒՆՆԵՐԻ ԵՒ
ՄՏԱՒՈՐԱԿԱՆՆԵՐԻ ՀԵՏ
Հայաստան-Թուրքիա
յարաբթրութիւնների հարցով հրապարակուած արձանագրութիւնների
ազգավնաս կէտերի լուսաբանման եւ այդ արձանագրութիւնների ստորագրման
դէմ համագաղութային կեցուածք ընդունելու ՀՅԴ Արեւմտեան Ամերիկայի
Կեդրոնական Կոմիտէի կազմակերպած միջոցառումների շրջանակում,
Երեքշաբթի, Սեպտեմբերի 15-ի երեկոյեան ժամը 7:30-ին տեղի ունեցաւ
զեկուցական-խորհրդակցական հանդիպում՝ գաղութիս կրթական,
հասարակական, հայրենակցական կազմակերպութիւնների եւ
մտաւորականութեան աւելի քան 60 ներկայացուցիչների հետ՝ Հայ
Օգնութեան Միութեան կենտրոնատեղիի ժողովասրահում:
Հանդիպման բացումը
կատարեց Կեդրոնական Կոմիտէի Հանրային Կապի գրասենեակի պատասխանատու
Սարօ Նազարեանը, որն անդրադառնալով հանդիպման նպատակին,
մասնաւորապէս ընդգծեց Արեւմտեան Հայաստանը խորհրդանշող
հայրենակցական միութիւնների մասնակցութիւնը սոյն արշաւին եւ
հրաւիրեց ինչպէս հայրենակցական միութիւնների, այնպէս էլ հանդիպմանը
ներկայ միւս կազմակերպութիւնների ներկայացուցիչներին, որ
«Ասպարէզ»ին ուղարկեն իրենց տեսակէտներն ու կարծիքները՝ թերթում
հրատարակուելու համար: Այնուհետեւ նա բեմ հրաւիրեց Կեդրոնական
Կոմիտէի անդամ Արամ Գալուստեանին՝ արձանագրութիւնների նկատմամբ
ՀՅԴաշնակցութեան ընդունած դիրքորոշման մասին մանրամասնութիւններ
ներկայացնելու համար: Յիշելով, որ հայ-թուրքական յարաբերութիւնների
գործընթացը հիմնականում սկիզբ առաւ
TARC
կոչուող հայ-թուրքական վերահաշտութեան տխրահռչակ յանձնաժողովի
աշխատանքներով, որոնք կարճ ժամանակ անց մատնուեցին կատարեալ
ձախողութեան, Արամ Գալուստեանը հանգամաօրէն վերլուծեց, այսպէս
կոչուած, ֆուտբոլային քաղաքականութեան եւ դրան հետեւած
Հայաստան-Թուրքիա յարաբերութիւնների հարցով արձանագրութիւնների
վտանգաւոր եւ ազգավնաս հետեւանքները՝ հայ ժողովրդի ընդհանրական
շահերի եւ Հայ Դատի հետապնդման տեսակէտից: Եզրափակելով իր
զեկուցական ելոյթը, նա կոչ արեց ներկաներին, որ համախմբուելով
ՀՅԴաշնակցութեան դիրքորոշման շուրջը, հանդէս գան
արձանագրութիւնների վնասակար կէտերը հիմնովին փոխելու, իսկ հակառակ
դէպքում՝ այն ձախողեցնելու միասնական պահանջով:
Այնուհետեւ առիթ
տրուեց ներկաներին, որ արտայայտեն իրենց տեսակետներն ու կարծիքները
սոյն արձանագրութիւնների վերաբերեալ: Դատապարտելով եւ բուռն կերպով
քննադատելով արձանագրութիւնների մէջ տեղ գտած ազգավնաս
նախատեսումները, նրանք կոչ արեցին Հայաստանի իշխանութիւններին,
մասնաւորաբար նախագահ Սերժ Սարգսեանին, որ մերժեն եւ ոչ մի գնով
չստորագրեն սոյն արձանագրութիւնները:
Հանդիպման աւարտին,
որին մասնակցում էին Վասպուրականի, Համախարբերդի, Չորք Մարզպանի,
Ուրմիայի հայրենակցական միութիւնները, Իրաքահայերի Օգնութեան
Հիմնադրամը, Նոր Ջուղայի Բարեկամներ յանձնախումբը, ՀԱՍԿ
կազմակերպութիւնը, Հայ Կրթական Հիմնարկը, Դաւթեան-Մարիամեան
Կրթական Հաստատութիւնը, Կալֆորնիայի Հայ Գրողների Միութիւնը, Հայ
Վետերաննի Միութիւնը, Հայ Արիական Բռունցքը, հասարակական գործիչներ
եւ մտաւորականներ՝ Ստեփան Թօփչեանը, Պօղոս Քուբելեանը, Խորէն
Արամունին, Պետրոս Հաճեանը եւ բազմաթիւ ուրիշներ, կոչ արուեց
խուռներամ մասնակցել Կիրակի, Սեպտեմբերի 27-ին, Գլենդէլում
կայանալիք ժողովրդային հաւաքին:
Հանդիպումը փակ
յայտարարուեց երեկոյեան ժամը 9:30-ին:
|
